काळे काळे केश तुझे काळे काळे डोळे
काळा काळा मेघ तुझ्या माथ्यावरी डोले
काळी काळी ढोरे तुझी काळ्या डोहाकडे
जेथे काळ्या जांभळाचे जागोजाग सडे
काळीतुन वाट तुझी काजळत्या वेळे
काळ्या काळ्या सावल्यांचे सभोवती जाळे
अशा धुंद काळेपणी तीट हवी गाली
काळी चंद्रकला, काळ्या किनारीची चोळी
काळी काळी पोत हवी कंठी तुझ्या पोरी
सावासही सुचे अशा काळोखात चोरी
काळ्या काळ्या वाघळांची घेरी इथे माया
काळ्या काळ्या वासनांची घोंगावते छाया
ये ग घरी,काळा तुझा साज तिथे सारा
काळ्या घडीत या अशा हो ग उरीं तारा
----बा.भ.बोरकर
कोणत्याही टिप्पण्या नाहीत:
टिप्पणी पोस्ट करा