उरल्या सुरल्या ओलाव्यावर
. शांता शेळके
***********************
उरल्या सुरल्या ओलाव्यावर
किती जिवाला भिजवित राहू ?
म्लान आठवांतुनी चार या
किती बहर मी सजवित जाऊ ?
बुजत चालल्या पाऊलवाटा
हिरवे रुजवे फुटले त्यावर
तिथेच वळते हट्टी पाऊल
कसा तया मी घालू आवर ?
भिंत कोसळे या इथली अन्
उठे इमारत उंच पलिकडे
पालटात या जलद, किती मी
जुन्या खुणांचे वेचू तुकडे ?
मिटली अवघी क्षितिजे म्हणता
क्षितिज त्यातुनी पुनश्च उठते
कळसूत्री बाहुली तशी मी
पुन्हा यंत्रवत् धावत सुटते
शांता शेळके
कोणत्याही टिप्पण्या नाहीत:
टिप्पणी पोस्ट करा