ज्यांची हृदये झाडांची
- मंगेश केशव पाडगावकर
******
ज्यांची हृदये झाडांची त्यांनाच फक्त फुले येतात
तेच वाढतात प्रकाश पितात, तेच ऋतू झेलून घेतात.
त्यांना मुळीच गरज नसते व्याख्यानबाज कंठांची
आणि कानठळ्या बसवणार्या अध्यात्मिक घंटांची.
त्यांना माणूस.. शिडी नसतो पाय ठेवून चढण्याची
त्यांच्या कुशित जागा असते हरलेल्याला दडण्याची.
ज्यांची हृदये झाडांची त्यांनाच फक्त फुले येतात
तेच फक्त गुच्छासारखा पावसाळा हुंगून घेतात.
-- मंगेश केशव पाडगावकर
कोणत्याही टिप्पण्या नाहीत:
टिप्पणी पोस्ट करा