माझ्या गोव्याच्या भूमीत
गड्या नारळ मधाचे,
कड्या-कपारीं मधुन
घट फुटती दुधाचे||
माझ्या गोव्याच्या भूमीत
आंब्या-फणसाची रास,
फुली फळांचे पाझर
फळी फुलांचे सुवास||
माझ्या गोव्याच्या भूमीत
वनश्रीची कारागिरी,
पाना-फ़ुलांची कुसर
पशु-पक्ष्यांच्या किनारी||
माझ्या गोव्याच्या भूमीत
उन्हाळ्यात खारा वारा,
पावसात दारापुढे
सोन्याचांदीच्या रे धारा||
माझ्या गोव्याच्या भूमीत
येते चांदणे माहेरा,
ओलावल्या लोचनांनी
भेटे आकाश सागरा||
माझ्या गोव्याच्या भूमीत
चाफा पानाविण फ़ुले,
भोळा भाबडा शालीन
भाव शब्दाविण बोले||
माझ्या गोव्याच्या भूमीत
गडे साळीचा रे भात,
वाढी आईच्या मायेने
सोन-केवड्याचा हात||
माझ्या गोव्याच्या भूमीत
सागरात खेळे चांदी,
आतिथ्याची, अगत्याची
सार्या षड्रसांची नांदी||
कवी - बा. भ. बोरकर
सोमवार, २३ सप्टेंबर, २०१३
माझ्या गोव्याच्या भूमीत-- कवी - बा. भ. बोरकर
याची सदस्यत्व घ्या:
टिप्पणी पोस्ट करा (Atom)
कोणत्याही टिप्पण्या नाहीत:
टिप्पणी पोस्ट करा