एका तळ्यात होती बदले पिले सुरेख
होते कुरूप वेडे पिल्लू तयांत एक ॥
कोणी न त्यास घेई खेळावयास संगे
सर्वाहूनि निराळे ते वेगळे तरंगे
दावूनि बोट त्याला म्हणती हसून लोक
आहे कुरूप वेडे पिल्लू तयांत एक ॥
पिल्लस दु:ख भारी भोळे रडे स्वत:शी
भावंड ना विचारी सांगेल ते कुणाशी
जे ते तयास टोची दावी उगाच धाक
होते कुरूप वेडे पिल्लू तयांत एक ॥
एकेदिनी परंतु पिल्लास त्या कळाले
भय वेड पार त्याचे वार्यासवे पळाले
पाण्यात पाहताना चोरुनिया क्षणैक
त्याचेच त्या कळाले तो राजहंस एक ||
ग.दि.माडगूळकर
कोणत्याही टिप्पण्या नाहीत:
टिप्पणी पोस्ट करा